Pasuritë e paluajtshme, BSH do të analizojë tregun dhe ekspozimin e bankave

Blerja e banesave nga individët, në pjesën dërrmuese të rasteve, realizohet me kredi bankare. Kjo bën që sistemi bankar të jetë shumë i ekspozuar ndaj zhvillimeve në tregun e pasurive të patundshme. Për këtë arsye, ky treg është renditur si një nga kryesorët që Banka e Shqipërisë duhet të analizojë gjatë këtij viti për të parë zhvillimet brenda tij.

Kuvendi në projektrezolutën për Bankën Qendrore cilëson se pjesë e kësaj vigjilence duhet të jetë edhe ekspozimi që ka sektori bankar në këtë treg.

Konkretisht në dokument specifikohet që BSH gjatë vitit 2023 “të analizojë me prioritet zhvillimet në tregun e pasurive të paluajtshme si dhe të monitorojë me kujdes ekspozimin e sektorit bankar ndaj këtij tregu, duke përmirësuar kuadrin e monitorimit dhe administrimit të rreziqeve në këtë drejtim si dhe zhvillimin e instrumenteve të nevojshme për të adresuar çdo kontigjencë të mundshme”.

Një vit më parë në listën e “kujdesit” Bankës ju vendos sektori i ndërtimit, i cili kishte një ecuri dinamike që vijon prej disa vitesh.

Sa i takon detyrave të tjera që Kuvendi i ka lënë BSH të paktën sipas draftit të projektrezolutës është që të monitorojë në vazhdimësi të gjitha zhvillimet e brendshme dhe të jashtme të ekonomisë si dhe të kujdeset të formulojë një politikë monetare, e cila të mundësojë kthimin e inflacionit në objektiv, me sa më pak kosto mbi rritjen afatgjatë të ekonomisë.