Nafta pa akcizë, fermerët kanë afat deri më 31 dhjetor për ta tërhequr

Fermerët kanë rritur aplikimet për të përfituar nga skema e shpërndarjes së naftës pa akcizë. Agjencia e Zhvillimit Bujqësor dhe Rural ka publikuar të dhënat, nga të cilat rezulton se nga verifikimet në terren deri më tani, nga kjo skemë kanë përfituar 19.412 fermerë, të cilët e kanë përdorur naftën për mbjelljen e 72 mijë hektarëve me kultura të ndryshme bujqësore.

Nga skema fermerët përfitojnë mesatarisht 70-100 litra naftë falas për çdo hektar tokë të mbjellë, në varësi të kulturave bujqësore. Kjo masë sipas zyrtarëve të Ministrisë së Bujqësisë shërben për të ulur kostot e fermerëve dhe nxitur prodhimin.

Për këtë vit, të gjithë aplikantët që do të shpallen fitues të skemës kanë afat deri më 31 dhjetor për të tërhequr sasinë e naftës në dispozicion të tyre.