Miratohet projektligji/ Qeveria lejon kultivimin e kanabisit mjekësor

Qeveria miraton projektligjin që lejon kultivimin e kanabisit për qëllime mjekësore në Shqipëri.

Ministrja e Shëndetësisë, Ogerta Manastirliu, njoftoi se vendimi u mor në mbledhjen e sotme të Këshillit të Ministrave, pas konsultimit me qytetarët, ku 61% e tyre u shprehën pro lejimit të kultivimit të kanabisit mjekësor.

Po ashtu, Manastirliu bëri me dije se ministritë që kanë propozuar projektligjin kanë nisur nga puna për inicimin e procesit dhe përcaktimin e rregullave për menaxhimin e duhur të kësaj veprimtarie industriale.

“Qeveria ka miratuar projektligjin për kontrollin e kultivimit dhe përpunimit të bimës së kanabisit dhe prodhimit të nënprodukteve të saj për qëllime mjekësore dhe industriale. Nga këshillimi kombëtar ku 61% e qytetarëve iu përgjigjën pozitivisht kësaj pyetje për inicimin e kësaj nisme ka filluar puna nga disa ministri. Ky projektligj që është propozuar nga Ministria e Shëndetësisë dhe Mbrojtjes Sociale, Ministria e Bujqësisë dhe Zhvillimit Rural dhe Ministria e Brendshme përcakton të gjithë kuadrin rregullator të mënyrës se si do iniciohet procesi për kontrollin e kultivimit dhe përpunimit të kanabisit vetëm për qëllime mjekësore”, deklaroi ministrja Manastirliu.