Makina e parë “Made in Albania”/ Zbulohet kush do të jetë në krah të sipërmarrëses Arjeta Puca në këtë mision

Një automjet tërësisht shqiptar. Brendi i parë “Made in Albania” edhe në sektorin automotiv. Deklaratat në podcatin e disa javëve më parë të kryeministrit Rama me sipërmarrësen Arjeta Puca për atë që e ai quajti “Ferrari from the balcans”, nuk kanë qenë thjesht për sensacion apo konsum publik. Tashmë bëhet fjalë për një projekt, me një plan të qartë për realizimin e tij.

Një nismë ambicioze, por jo e pamundur, që bën bashkë dëshirën, vizionin dhe eksperiencën. Sipërmarësja Arjeta Puca nuk do të jetë e vetme në këtë “mision”. Nga burimet tona brenda kryeministrisë kemi mësuar se pjesë e projektit do të jetë edhe qeveria shqiptare nëpërmjet Korporatës së Investimeve Shqiptare. Do të jetë ky institucion, “që do të shtyjë automjetin shqiptar, teksa sipërmarja do të jetë në timon”, sic u shpreh dhe vetë kryeministri në podcast.

“Korporata e Investimeve Shqiptare do të investojë në prodhimin e makinës së parë shqiptare, duke mbështetur idenë dhe vizionin e Arjeta Puca. Korporata është ngritur për identifikimin e aseteve dhe strukturimin e projekteve të investimit, në fusha si industria, energjia, teknologjia, turizmi etj. Së bashku me ekspertizën e Arjetës, Korporata e Investimeve Shqiptare do të zhvillojë dhe do të materializojë projektin ambicioz të ndërtimit të një makine ’super car’ shqiptare, e cila do të konkurrojë në tregjet globale”, shprehen burimet e mësipërme për Fast Neës Economy.

Kush është sipërmarrësja që do të realizojë automjetin e parë shqiptar?

Sipërmarrësja Arjeta Puca është themeluese e kompanisë TIMAK në Shqipëri, e specializuar në prodhimin e makinerive dhe superstrukturave dhe aktive në tregun shqiptar që prej vitit 2016. TIMAK ofron shërbime me kualitet të lartë në më shumë se 16 shtete, si Bullgari, Maqedoni e Veriut, Mal i Zi, Turqi, Kosovë etj.

Arjeta lindi në Bulqizë dhe në vitin 1991, kur ishte vetëm 4-vjeç, familja e saj largohet drejt Turqisë. Ajo kthehet për vizitë në Shqipëri në vitin 1996 dhe vendos për të qëndruar përfundimisht dhe për të hapur fabrikën e saj.

Arjeta Puca është zgjedhur nga OKB-ja për të prodhuar 500 autoambulanca që do t’i dhurohen Ukrainës.  Fabrika prodhon makinat e saj në afërsi të Tiranës dhe këto automjete përdoren për urgjencat e plagosurve të luftës në Ukrainë, emergjencat spitalore apo emergjencat kombëtare në Shqipëri, forcave të armatosura dhe zjarrfikësve.

Kompania TIMAK është e fokusuar në prodhim, konvertim dhe montim të konstruksioneve metalike dhe plastike të automjeteve të ndryshme, si p.sh autoambulanca, zjarrfikëse, kamion pastrimi, mjete për mirëmbajtje dimërore dhe verore, makina të ujërave të zeza, batipal, mjete të lëvizsshme dhe mjete të tjera të ngjashme.

Automjetet personalizohen sipas karakteristikave të shërbimit të ofruar. Kështu psh makinat e policisë kanë të intergruar një paketë të përmirësuar të frenave dhe pezullimit, e cila përmirëson sigurinë, trajtimin, redukton kostot e mirëmbajtjes dhe kohën e ndërprerjes së automjetit. Njëlloj dhe për mjetet e tjera bëhet ndërhyrje sipas nevojave specifike.

Krijimi i TIMAK ka ardhur si një nismë për rritjen e produkteve “Made in Albania” dhe me synimin që këto produkte të dominojnë tregun vendas me një cilësi maksimale. Gjithashtu ,një pjesë e rëndësishme e misionit të TIMAK është të krijojë mundësi dhe të mbështesë gratë në fushat e industrisë që janë të dominuara nga burrat.

Këtyre objektivave tani u shtohet një tjetër: ai i krijimit të “Ferrarit” shqiptar!