LIGJET E BIZNESIT
Bledar Shella, Drejtor i Përgjithshëm i Bankës OTP Albania është rizgjedhur në krye të Shoqatës Shqiptare të Bankave. Shoqata ka bërë të ditur nëpërmjet një njoftimi për shtyp se zgjedhjet për Kryetarin dhe anëtarët e rinj të Bordit Mbikëqyrës u zhvilluan gjatë mbledhjes së Asamblesë së Anëtarëve, ku anëtarët ri-konfirmuan z. Shella si Kryetar të AAB-së.
“Në funksionin e Kryetarit, z. Shella do të vazhdojë të përfaqësojë zërin e anëtarëve për çështjet e digjitalizimit dhe vizibilitetit duke promovuar interesin më të mirë të AAB-së dhe anëtarëve të saj”, theksohet në njoftimin për shtyp të Shoqatës së Bankave.
Përveç zgjedhjes së Kryetarit të ri, janë zgjedhur edhe disa emra të rinj si pjesë e Bordit Mbikëqyrës.
Bordi i ri Mbikëqyrës i AAB-së përbëhet si më poshtë:
- Bledar Shella – Drejtor i Përgjithshëm i Bankës OTP Albania – Kryetar i Bordit Mbikëqyrës të AAB-së;
- Seyhan Pencabligil – Drejtor i Përgjithshëm dhe Anëtar i Bordit Drejtues i Bankës Kombëtare Tregtare (BKT) – Zëvendës Kryetar i Bordit Mbikëqyrës të AAB;
- Maltin Korkuti – Drejtor i Përgjithshëm i Credins Bank – anëtar i Bordit Mbikëqyrës të AAB-së;
- Andi Ballta – Drejtor i Përgjithshëm i Bankës Amerikane të Investimeve – anëtar i Bordit Mbikëqyrës të AAB-së;
- Flutura Veipi – Drejtore e Përgjithshme e Union Bank – anëtare e Bordit Mbikëqyrës të AAB-së.
Në njoftimin e saj, Shoqata e Shqiptare e Bankave shprehu mirënjohjen për anëtarët e mëparshëm të Bordit Mbikëqyrës, Dritan Mustafa, Drejtor i Përgjithshëm i Tirana Bank dhe Bozhidar Todorov, Drejtor i Përgjithshëm i Fibank Albania, për përkushtimin dhe kontributin e tyre të rëndësishëm në Shoqatë.
