Në Shqipëri, gratë kujdesen për shtëpinë dhe fëmijët. Një situatë që në vendin tonë konsiderohet normale, por në vendet e zhvilluara quhet punë e papaguar, nga e cila jo vetëm gratë, por edhe shoqëria dhe ekonomia në tërësi humbet shumë.
Për këtë temë u diskutua këtë të premte në A2 Business me gazetaren Aurora Sulce, ku Eranda Ymerali, eksperte për punësimin, tha se zonat rurale dhe qytetet e vogla e vuajnë më shumë këtë fenomen. “Janë disa profesione ose puna e grave që fokusohet në shtëpi, është një punë e “padukshme” dhe nuk është e listuar në profesionet kombëtare të cilat kategorizohen në faqet zyrtare dhe të jenë të paguara. Zakonisht ky fenomen prek ato vende që janë në nivel mesatar dhe të ulët të nivelit ekonomik.
Zonat rurale dhe qytetet e vogla e vuajnë më shumë këtë fenomen, ku gratë shikohen vetëm si ndihmuese në punët e shtëpisë dhe vetëm burrat janë ata që duhet të sjellin të ardhura në shtëpi”, tha Eranda Ymerali, eksperte për punësimin.
Ndërkohë, Mirilda Tili, gazetare ekonomie, e quajti alarmant përfundimin në të cilin a dalë studimi i fundit se puna e papaguar në vendin tonë ka një efekt gati 60% të Prodhimin të Brendshëm Bruto
“Beteja për vajzat dhe gratë në vendin tonë mbetet shumë e madhe mes paragjykimit, mentalitetit, dëshirës për të qenë edhe ato kontributore në ekonominë e familjes. Nëse këto zonja do të paguheshin për të gjitha shërbimet që kryejnë do të kishin shumë më shumë paga të larta edhe se burri që punon jashtë shtëpisë.
Nga një raporti i fundit doli se puna e papaguar në vendin tonë ka një efekt gati 60% të prodhimin të brendshëm bruto. Nëse kjo është një shifër që ka dalë nga një studim i mirëfilltë, është alarmante. Do të ishin 10 mijë vende punë nëse do të paguheshin. Nëse këto 10 mijë zonja të ishin të deklaruar, do të ishte një arritje e madhe në ekonominë e vendit”, tha Tili.
