Investimet publike janë rritur ndjeshëm në prag të zgjedhjeve vendore të 14 majit, një dukuri e pritshme dhe e kthyer tashmë në “traditë” nga të gjitha qeveritë.
Ndërsa në fund të vitit të kaluar, rreth 40 për qind e fondit total të shpenzimeve publike nuk ishte disbursuar, situata ka ndryshuar në 3 mujorin e parë të këtij viti. Investimet janë rritur ndjeshem dhe vecanërisht në mars.
Sipas të dhënave të Ministrisë së Financave, në 3 muajt e parë të vitit janë disbursuar për investime publike 12.7 miliardë lekë, nga 8 miliardë lekë që disbursuan në të njëjtën periudhë të një viti më parë, me një rritje prej 41.2 për qind.
Nëse do ta analizojmë në bazë mujore vihet re se në muajin mars 2023, niveli i fondeve te shpenzuara është më i larti krahasuar me të njëjtën periudhë të paktën në 5 vitet e fundit. Konkretisht vetëm në Mars janë shpenzuar rreth 11 miliardë lekë, me një kapërcim prej 4.6 miliardë lekësh krahasuar me marsin 2022.
Dhe ajo që vihet re nga shifrat, është se ndryshe nga një vit më parë, ecurinë më të madhe e kanë pasur projektet me financim të brendshëm. Ky është një fenomen i zakonshëm që ndodh në raste fushatash zgjedhore, ku qeveria përqendron investimet në muajt që i paraprijnë zgjedhjeve, në mënyrë që të rikthejnë në vëmendjen e qytetarëve punën që bëhet në shërbim të tyre.
