LIGJET E BIZNESIT
Kërkesa e lartë e qytetarëve për të investuar në letrat me vlerë të qeverisë ka ulur interesat e tyre. Sipas të dhënave të Bankës së Shqipërisë, yield-i uniform i pranuar dhe kuponi i obligacioneve 7-vjeçare në ankandin e kësja jave shënoi nivelin 5.21%, në rënie nga niveli prej 5.45% i ankandit të fundit (rihapje) të këtyre instrumenteve që ishte zhvilluar në muajin mars.
Pjesëmarrja e investitorëve edhe në këtë ankand rezultoi e lartë, me kërkesa totale në vlerën e 5.46 miliardë lekëve, nga 3 miliardë lekë që kishte qenë shuma e shpallur për financim.
Ministria e Financave vendosi të rriste shumën e pranuar të ofertave në maksimumin prej 15% të lejuar nga kuadri nënligjor për huamarrjen, për një vlerë totale emetimi prej 3.45 miliardë lekësh.
Rënie të mëtejshme këtë javë pësuan edhe yield-et e obligacioneve dyvjeçare. Në ankandin e rihapjes, yield-i uniform i pranuar zbriti në 4.16%, nga 4.35% që kishte qenë në ankandin fillestar të zhvilluar në muajin prill.
Që prej dhjetorit të vitit të kaluar, yield-et e titujve të borxhit të qeverisë shqiptare kanë nisur një cikël korrigjimi në rënie. Kjo për shkak të kërkesës së lartë të qytetarëve për të investuar, të cilët po i shohin letrat me vlerë të qeverisë si alternativa të leverdishme.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
