LIGJET E BIZNESIT
Ditën e enjte, parlamenti pritet të miratojë reformën e pagave. E thënë ndryshe, projektligjet që parashikojnë rritjen e pagave në administratë, të premtuar nga kryeministri deri në 900 euro në muaj mesatarja brenda një periudhe dy vjecare.
Por ndërsa projekti fillestar i Ministrisë së Financave parashikon fillimisht rritjen e pagave për rreth 130 mijë të punësuar në sektorin publik, pritet që numri i përfituesve të jenë shumë më shumë.
Kjo pasi rritje pagash që në fazën e parë do të përfitojnë edhe funksionarët e lartë, duke përfshirë Presidenti, kryeministri, zv.kryeministri, Kryetari i Kuvendit, ministrat dhe deputetët. Janë këta të fundit që në Komisionin parlamentar të Ekonomisë kanë vendosur rritjen e pagave për funksionarët e lartë dhe ky propozim i miratuar pritet të votohet të enjten në seancë plenare.
Sa do të rriten pagat e funksionarëve të lartë?
Rritje do të pësojnë të gjithë funksionet, duke filluar nga Presidenti, paga e të cilit bëhet 425.000 lekë, me rritje 168.000 lekë. Paga e kryeministrit dhe kryetarit të Kuvendit do të rritet në 393.125 lekë; paga e zv.kryeministrit do të bëhet 330.000 lekë; paga e ministrit do të bëhet 318.750 dhe paga e deputetit do të bëhet 310.250 lekë.
Efektet e ligjit për rritjen e pagave do të reflektohen që në qershor dhe do të përfshijë rritjen duke filluar nga muaji prill. Ndërkohë me ligjet e reja administratës publike do t’i indeksohet paga çdo dy vjet, ndërsa ndryshime ka edhe për caktimin e shpërblimeve për pozicione që konsiderohen me prioritet kombëtar.
