LIGJET E BIZNESIT
Rriten interesat e letrave afatgjata me vlerë të qeverisë. Nrdyshe ngasa po ndodh me bonot e thesarit, ku kërkesa e lartë ka ulur normat e interesit, në obligacionet me afat 15 vjeçar ka ndodhur e kundërta.
Sipas të dhënave të Ministrisë së Financave, yield-i uniform i pranuar i obligacioneve arriti në 7.08%. Ankandi i kësaj jave ishte rihapje e ankandit të mëparshëm të obligacioneve 15 vjeçare, që ishte zhvilluar në muajin shkurt dhe që kishte shënuar një yield uniform dhe kupon prej 6.8%.
Rritja e yield-it në ankandin e kësaj jave i detyrohet një rënieje të ndjeshme të kërkesës së investitorëve, krahasuar me ankandet e mëparshme.
Nga 2 miliardë lekë që ishte shuma e shpallur për financim nga Ministria e Financave, vlera totale e kërkesave të paraqitura në ankand ishte vetëm 1.75 miliardë lekë. Nga këto, Ministria e Financave pranoi kërkesa vetëm për 1.54 miliardë lekë, me qëllim mbajtjen e një yield-i uniform më të ulët.
Mosplotësimi i shumës së planifikuar nuk krijon shumë probleme për Ministrinë e Financave, duke pasur parasysh se veçanërisht gjatë tremujorit të parë të vitit shumat e huamarrjes kanë qenë edhe më të mëdha se planifikimi, ndërsa sipas të dhënave të deritanishme të vitit 2023 balanca buxhetore paraqitet ende në suficit.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Ankandet për instrumentet afatgjata në përgjithësi kanë një pjesëmarrje më të ulët të investitorëve të vegjël, kryesisht individëve, që preferojnë në shumicën e rasteve të investojnë në instrumente afatshkurtra. Kërkesa më e pakët në këtë ankand duket se ka sjellë kthimin e rritjes së yield-eve, tendencë që nuk është vërejtur në instrumentet e tjera.
Për instrumentet më afatshkurtra, duke filluar nga obligacionet 5-vjeçare e deri tek bonot 12-mujore, yield-et kanë vijuar rënien edhe në ankandet që janë zhvilluar gjatë dy javëve të fundit.
