SPAK ka bërë bilancin e punës për vitin 2022, ku ka rezultuar se pjesa më e madhe e veprave penale të regjistruara kanë qenë në fushën e korrupsionit. Gjatë vitit që lamë pas, Struktura e Posaçme kundër Korrupsionit dhe Krimit të Organizuar ka regjistruar 422 procedime penale në fushën e korrupsionit ose 83 më shumë se një vit më parë. Në total, çështjet e lidhura me korrupsionin përbënin rreth 65.6% e veprave penale të regjistruara.
Numrin më të lartë të procedimeve penale të regjistruara e ka neni 258 i Kodit Penal “Shkelja e barazisë së pjesëmarrësve në tendera apo ankande publike” me 92 procedime penale të regjistruara dhe neni 248 i Kodit Penal “Shpërdorimi i detyrës” me 86 procedime penale të regjistruara.
Në lidhje me çështjet e regjistruara rezulton se janë dërguar për gjykim 43 çështje, 30 çështje janë pushuar, 5 çështje janë pezulluar, 59 çështje janë transferuar, ndërkohë që 285 çështje rezultojnë të mbetura në hetim.
Nga 43 çështjet e dërguara për gjykim për vitin 2022, të cilat zënë rreth 10.2% të çështjeve të hetuara në fushën e korrupsionit, rezulton se numri i të hetuarve/pandehurve ka qenë 208 persona. Nga këto çështje për 75 persona është caktuar masa e sigurimit “Arrest me burg” ( një rritje 2.34 herë më tepër nga vitit 2021), për 27 persona është caktuar masa e sigurimit “Arrest në shtëpi” (11 persona më shumë) dhe për 14 persona është caktuar masa e sigurimit “Detyrim për paraqitje në policinë gjyqësore” (një rritje me 8 persona më shumë se vitin e kaluar).
Për vitin 2022 rezulton se ka përfunduar gjykimi i themelit në Gjykatën e Posaçme të Shkallës së Parë për Korrupsionin dhe Krimin e Organizuar për 27 çështje penale për veprat penale kundër korrupsionit me një numër prej 140 të pandehurish.
