Rritja e pagës mesatare/ Drejtoresha e NOA: Nuk është momenti i duhur. Ish zv.ministri: Premtim elektoral

Drejtorja ekzekutive e NOA, Herjola Spahiu, e ftuar në “A2 BUSINESS” nga Aurora Sulçe u shpreh se ritmi i rritjes së këtij viti është tejet shqetësues për momentin në të cilin jemi, pasi është shumë herë më i lartë se vitet e mëparshme.

Sipas Spahiut, ky nuk është momenti i duhur për ta bërë një premtim të tillë, ndërsa tha se nuk mund të mohonte, për nga mënyra se si u promovua, se nuk ka lidhje me fushatën zgjedhore.

“Mendoj që të gjithë janë shumë pozitivë për tendencën për rritjen e pagave, por ajo që është shqetësuese është ritmi i rritjes së këtij viti, që është shumë herë më i lartë se ajo që ne kemi realizuar në dy vitet e mëparshme. Dhe duke ditur në paralel se sa i ngushtë është buxheti shtetëror për të lejuar këtë rritje.

Mendoj që nuk është momenti i duhur ky për të bërë këtë premtim. Do të ishte më shumë pozitiv nëse njoftimi i rritjes së pagës do të kishte ndodhur në një moment tjetër, dhe jo kaq afër datës së zgjedhjeve lokale”, u shpreh Spahiu.

A lidhet kjo me fushatën elektorale?

“Mënyra se si është promovuar është shumë e drejtpërdrejtë, nuk mund të them që nuk lidhet”, u shpreh Spahiu. I të njëjtit mendimin është edhe eksperti i ekonomisë, Kastriot Sulka. Sipas tij, arsyeja e këtij vendimi është afrimi i zgjedhjeve, ndërsa shtoi se, ne zor se gjejmë në administratën shtetërore kategori të pagave dhe të punonjësve të ngjashme me të sektorit privat.

“Premtim elektoral, nuk diskutohet. Ne kemi një rritje rreth 6 për qind, aty vërtitemi. Pothuajse nuk kemi asnjë lloj efekti në xhepat e njerëzve. Ndërkohë po premtojmë që do kemi rreth 18 për qind, pra rreth 3 herë më shumë se ç ‘është bërë në këto kushte kur kemi thënë që kemi pasur një sforcim.

Pra nga ky këndvështrim duhet të dimë se kush ka qenë arsyeja, dhe arsyeja janë zgjedhjet. Në momentin që do të kemi një rritje, rritja e pagës minimale mund të detyrojë një lloj detyrimi për komplet skatierën e pagave në vend.

Që të jemi të sinqertë, ne zor se gjejmë në administratën shtetërore kategori të pagave dhe të punonjësve të ngjashme me të sektorit privat, si fasoni për shembull. Është e rëndësishme të kuptojmë se nga na vijnë këto të ardhura, nga na vjen financimi”, deklaroi Sulka.