Qeveria nuk dëgjon biznesin, del raporti i Këshillit të Investimeve

Qeveria dhe institucionet e saj nuk i marrin parasysh rekomandimet e biznesit. Sipas raportit të Këshillit të Investimeve që mbulon periudhën 2015-2022, 40% e rekomandimeve të dhëna dhe që kanë synuar intensifikimin e dialogut mes qeverisë dhe sektorit privat, nuk janë përmbushur, ndërsa 16% e tyre janë në proces zbatimi. në total, gjatë këtyre viteve janë dhënë nga Këshilli i Investimeve 295 rekomandime.

Tematikat me numrin më të lartë të rekomandimeve të pazbatuara aktualisht janë “Potenciali i investimeve dhe sektorët prioritarë”, me 15% të totalit të rekomandimeve, “Siguria juridike mbi pronën”, me 14% dhe “Promovimi i Investimeve në Agropërpunim”, me 8%.

Në raport, vlerësohen pozitivisht disa institucione, që në vitet e mëparshëm kanë qenë pasivë, sikur është Ministria e Bujqësisë dhe Zhvillimit Rural, Drejtoria e Përgjithshme e Tatimeve, Inspektorati Qendror, Agjencia Për Zhvillimin e Territorit dhe Ministria e Financave dhe Ekonomisë. Ndërkohë që, Agjencia Shtetërore e Kadastrës dhe Ministria e Turizmit dhe Mjedisit kritikohen për mungesën e reagimit.

“Pas shumë përpjekjesh për marrje informacioni nuk u arrit dot shkëmbim informacioni dhe janë ndër institucionet me një numër të konsiderueshëm rekomandimesh”, theksohet në raport.

Ndërkaq, për vitin 2022, fushat kryesore të ndërhyrjes, bazuar në rekomandimet e Këshillit të Investimeve janë ndryshimet ligjore në drejtim të inovacionit në sipërmarrje, ndryshime ligore në drejtim të nxitjes së investimeve në agro-pëprunim, ndërhyrje të mëtejshme në funksionalitetet e platformës e-Leje, dixhitalizim i procedurave të rimbursimit të TVSH-së, etj.