Euro pa frena, prek rekordin e ri historik në 112.3 lekë

Euro po shënon çdo ditë minimume të reja historike. Sipas kursit zyrtar të Bankës së Shqipërisë, monedha europiane ka zbritur në 112.3 lekë, duke humbur 0.3 lekë kundrejt një dite më parë. Ndërsa kundrejt fillimit të vitit, monedha europiane ka humbur mbi 4 lekë.

Rënia e fortë dhe e përditshme e euros po ndodh për shkak të prishjes së balancave në tregun e këmbimit. Oferta për monedhën europiane është e lartë, si pasojë e sasisë së madhe të valutës që po hyn nga dërgesat e emigrantëve, turizmi, investimet e huaja, por edhe burimet informale. Ndërsa kërkesa për euro është e dobët. Tregtarët dhe importuesit po tërheqin më pak euro për të blerë mallra, si pasojë e tkurrjes së konsumit. Kjo vërtetohet edhe nga rënia e të ardhurave nga TVSH-së në dy muajt e parë të këtij viti.

Euro pritet të luhatet në nivele të ulëta gjatë gjithë vitit, ndërsa nuk përjashtohet një dobësim i mëtejshëm i saj, duke pasur parasysh sezonin turistik në prag.