Eksportet shqiptare po kalojnë ditë të vështira. Mungesa e fuqisë punëtore dhe rënia e fortë e euros po penalizojnë këtë sektor. Të dhënat e fundit të Institutit të Statistikave tregojnë se në mars, eksportet e mallrave arritën vlerën 42 miliardë lekë, duke shënuar një rënie prej -11.7% kundrejt të njëjtës periudhë të një viti më parë. Tendenca negative vjen pasi në shkurt eksportet ishin zgjeruar me vetëm 2.8%.
Në këtë ecuri negative kanë dhënë ndikim ulja e çmimeve në shitjet e dy grupeve kryesore, atë të mineraleve e lëndëve djegëse dhe materialeve të ndërtimit e metaleve.
Ndërkohë në stanjacion është dhe industria tekstile e këpucë, që është dhe eksportuesi më i madh në vend. Në mars, eksportet e “Tekstile dhe këpucë”, u zgjeruan me më pak se 1% me bazë vjetore, teksa në shkurt ishin ngadalësuar në 4.2% me bazë vjetore, nga 12.8% që kishte qenë ecuria në janar.
Ndryshe nga viti i kaluar, kur të gjitha grupet po rriteshin me ritme të shpejta në vlerë, për shkak si të rikuperimit pas pandemisë ashtu dhe të çmimeve të larta, këtë vit grupet më të mëdha po shfaqin ecuri të dobët, ndërsa po mbajnë ritmin produktet bujqësore dhe industria automotive.
