Bashkitë me mendje tek zgjedhjet, të ardhurat e pushtetit vendor bien me 50% në 2-mujor

Bashkitë janë të përqendruara tek zgjedhjet dhe pak po merren me menaxhimin e financave. Ose e thënë më mirë, me mbledhjet e të ardhurave. Sipas të dhënave zyrtare, të ardhurat nga për pushtetin vendor në janar-shkurt 2023 shënuan rënie me 50 për qind. Ato arritën në janar-shkurt në 2,9 miliardë lekë ose rreth 24 milionë euro (50%) më pak se 2-mujori i vitit 2022.

Ndikimin më të lartë negativ e dhanë të ardhurat nga taksat lokale, të cilat rezultuan vetëm 2,3 miliardë lekë në dy mujor, nga 5.3 miliardë lekë që ishin në të njëjtën periudhe të vitit të kaluar.

Edhe pse tregu i banesave është në lulëzim dhe qindra objekte të reja janë futur në treg në të gjithë vendin, të ardhurat nga taksa mbi ndërtesat që vilen nga bashkitë ishin 4.4% më të ulëta se dy -mujori 2022.

Të ardhurat e bashkive nga një varësi të larta nga taksa mbi ndërtimet e reja. Ndryshimet ne lejet për ndërtimin e banesave të reja reflektohen në të ardhura, Vitin e kaluar në dy mujorin e parë pati një rritje jo të zakonte të ardhurave vendore pikërisht nga volumi i lartë i ndërtimeve të reja. Arkëtimet në muajt e parë të këtij viti tregojnë se volumi i lejeve për banesa të reja ka qenë më i ulët.

Në krahun tjetër shpenzimet e qeverisë qendrore për pushtetin vendor pësuan rritje me 6 për qind për të njëjtën periudhe, ndërkohë që pagesat për ndihmën ekonomike u rriten me 17%. Shpenzimet kapitale gjithashtu ishin me rritje vjetore gati 10%.

Përkeqësimi i të ardhurave nga pushteti vendor rrezikon të lërë pa një seri shërbimesh komunitetet, sidomos ato në zonat më të varfra.