LIGJET E BIZNESIT
Në një kohë që kryeministri Edi Rama ka deklaruar se Shqipëria po shikon mundësinë që të dalë nga juridiksioni i arbitrazhit ndërkombëtar, ministri i Drejtësisë, Ulsi Manja, prezantoi një projektligj lidhur me këtë çështje, për të cilin tha se ka disa vite që po punohet bashkë me ndërkombëtarët.
“Do të krijojë një mjedis pozitiv për zhvillimin e biznesit dhe të investimeve në Shqipëri. I krijon mundësinë qeverisë që të thithë investime, qoftë të brendshme dhe qoftë të huaja, duke krijuar një ndikim pozitiv për biznesin dhe ekonomisë së vendit”.
Synimi i këtij ligji duket se është shmangia e dërgimit të çështjeve në arbitrazhin ndërkombëtar, gjykatë në të cilën shteti shqiptar ka humbur një seri gjyqesh me fatura qindra milionë euro, duke u përpjekur që mosmarrëveshjet të zgjidhen brenda vendit.
“Me këtë projektligj ne i japim mundësinë që t’i zgjidhë mosmarrëveshjet, qoftë mes shtetit dhe privatit apo dhe mes privatëve me njëri-tjetrin t’i zgjidhë tërësisht në autonominë e vullnetit të palëve. Është një zgjedhje e shpejtë dhe eliminon informalitetet, por njëkohësisht përmbush dhe detyrimet që burojnë nga mosmarrëveshjet tregtare”.
Qeveria ka gati edhe një projektligj që ndihmon partitë politike për strehimin e tyre. Të drejtë për të pasur zyra me qira të paguar në shteti do kenë vetëm ato parti që në tri zgjedhjet e fundit të përgjithshme marrin mbi 1% të votave në rang kombëtar.
“Aty ku ka ambiente publike, do të jetë një kontratë që do të lidhin me Ministrinë e Brendshme, ndërsa aty ku nuk ka ambiente publike, qeveria merr përsipër pagesën e qirasë, por do të përcaktohen kufijtë maksimalë të qirasë dhe sipërfaqes”.
I pyetur nga gazetarët, Manja mohoi që ky projektligj të ketë synimin të ndërhyjë në çështjen e selisë së Partisë Demokratike, e pretenduar nga të dyja grupimet.
“Zoti u dhëntë fuqi që t’i zgjidhin vetë mosmarrëveshjet”, tha ai.
