Mbikëqyrësi i Bashkimit Europian i ka kërkuar Komisionit të japë detaje mbi udhëtimet e punës që kanë bërë anëtarët e stafit të lartë që nga viti 2021, të cilat janë paguar pjesërisht nga palët e treta, ndërsa Brukseli vazhdon të mbështillet nga pasojat e një skandali korrupsioni që ka përfshirë Parlamentin.
Në një letër drejtuar Presidentes së Komisionit Europian, Ursula von der Leyen, zyra e Ombudsmanit Europian i kërkoi ekzekutivit të qartësojë rregullat që zbaton për të përcaktuar se nuk ka konflikt interesi kur udhëtimet e biznesit paguhen nga të tjerët.
Kjo pasi doli se Drejtori i Përgjithshëm i Departamentit të Transportit të Komisionit (DG MOVE), Henrik Hololei, udhëtoi disa herë në kurriz të qeverisë së Katarit ose organizatave pranë saj midis 2015 dhe 2021, pavarësisht se departamenti i tij ishte i përfshirë në negociata për një marrëveshje për transportin ajror BE-Katar.
Marrëveshja, e nënshkruar në tetor 2021, parashikonte që të gjitha linjat ajrore të Katarit do të ishin në gjendje të kryenin fluturime direkte për dhe nga çdo aeroport në BE dhe Katar dhe anasjelltas për linjat ajrore të BE-së. Marrëveshja nuk është ratifikuar ende, por është zbatuar përkohësisht.
“Qeveria e Katarit dhe organizatat pranë saj që paguajnë për shpenzimet e udhëtimit për zyrtarin më të lartë të DG MOVE lindin pyetje legjitime rreth ndikimit të mundshëm të padrejtë të vendimmarrjes së BE-së në këtë fushë”, shkroi Ombusmeni Emilly O’Reilly në letrën e saj.
Një zëdhënës i Komisionit u tha gazetarëve se shumica dërrmuese e udhëtimeve të biznesit që ndërmerr personeli paguhen plotësisht nga ekzekutivi, por në disa raste, palët e treta mund të marrin pjesë. Kjo përfshin, për shembull, organizatorët e një ngjarjeje që lidhet me udhëtimin.
Sipas zëdhënësit, vetëm rreth 1.5% e misioneve të kryera jashtë vendit nga stafi i Komisionit përfshijnë kontribute nga palë të treta. Shifra më pas bie në afërsisht 0.1-0.2% për Drejtorët e Përgjithshëm. Nëse përfshihen para nga palët e treta, Komisioni kryen një analizë për të vlerësuar çdo konflikt të mundshëm interesi.
