Inflacioni i lartë detyroi Bankën e Shqipërisë të rriste normën bazë të interesit për lekun. E thënë ndryshe, të shtrenjtonte monedhën kombëtare. Për herë të parë pas shumë vitesh, kahu i politikës monetare ndryshoi. Kjo do të paralajmëronte një shtrenjtim të kredive në lek, ashtu sic edhe ka ndodhur.
Rritja e parë e normës bazë nga Banka e Shqipërisë u bë më 23 mars të vitit të kaluar, ku u rrit nga 0.5% minimumi historik në 1%. Gati tre muaj më vonë, institucioni mbikëqyrës bankar do të bënte një tjetër rritje të normën bazë, duke e cuar në 1.25%. Ndërhyrjet nuk do të përfundonin këtu. Në muajt pasues politika monetare e BSH-së u bë edhe më agresive, përballë një inflacioni të lartë dhe kokëfortë. Më 3 gusht norma bazë e interesit për lekun u rrit në 1.75%; më 6 tetor më 2.25% dhe rritja e fundit u bë më 3 nëntor 2022, duke arritur nivelin e 2.75%.
Një shtrëngim i tillë i politikës monetare u shoqërua me shtrenjtim të kredive në lek. Ndërkohë që edhe kreditë në monedhat e tjera pësuan të njëjtën tendencë. Kjo pasi inflacioni në shifra rekord që ka pushtuar ekonomitë në mbarë botën, i detyroi bankat qendrore që të rrisin normat bazë të interesit, në tentativë për të përmbajtur rritjen e paprecedent të çmimeve. Një rritje e mëtejshme e interesave nga bankat qendrore është sinjalizuar tashmë. Një instrument që synon të frenojë rritjen e inflacionit, por që mban vështirësitë e veta, pasi rrit koston e kredive, duke rrezikuar huamarrësit nga bizneset apo qytetarët.
