Shërbimet online, por me zgjedhjet në prag është rritur numri i të punësuarve në shtet

Teksa qeveria ka shpallur Agendën Digjitale, e cila duhet të shoqërohej me shkurtimin e numrit të punonjësve në administratë, për shkak të ofrimit të shërbimeve online, e kundërta ka ndodhur. Të dhënat e fundit të Institutit të Statistikave tregojnë për një fryrje të administratës shtetërore në tremujorin e fundit 2022.

Sipas statistikave, në këtë periudhë, numri i të punësuarve në shtet arriti në 184,396 persona, duke shënuar një rritje prej 2,236 persona kundrejt tremujorit të tretë 2022. Ndërsa krahasuar me të njëjtën periudhë të një viti më parë, numri i të punësuarve në sektorin shtetëror është rritur me 818 persona.

Ofrimi i shërbimeve online duhet të ishte shoqëruar me shkurtimin e numrit të punonjësve, duke qenë se gjithçka është digjitale. Por kjo nuk ka ndodhur, përkundrazi. Rritja e numrit të të punësuarve në administratën shtetërore mund të lidhet me efektin elektoral. Më 14 maj janë parashikuar të zhvillohen zgjedhjet vendore dhe eksperienca e viteve mëparshme ka treguar sesa herë ka pasur zgjedhje, numri i të punësuarve në shtet është rritur. Shifrat tregojnë se edhe ky vit nuk ka bërë përjashtim.