Pensionet private po shihen si mënyra më e mirë për të investuar, me qëllim sigurimin e të ardhurave kur të arrihet mosha e pensionit. Qytetarët shqiptarë po ndërgjegjësohen për një investim të tillë, kaq shumë të nevojshëm në jetën e tyre.
Të dhënat e fundit të Autoritetit të Mbikëqyrjes Financiare tregojnë se numri i anëtarëve në skemat private në fund të 2022-shit arriti në mbi 36 mijë duke u zgjeruar me 8.7 për qind në raport me vitin 2021. E thënë ndryshe, janë rreth 3 mijë shqiptarë të tjerë që u përfshinë vitin e shkuar në skemën e pensioneve vullnetare.
Rritje kanë pësuar edhe fondet e investuara. Të dhënat zyrtare tregojnë së vlera e parave të investuara kapi shifrën e 5.7 miliardë lekë nga 4.6 miliardë në vitin 2021, duke u rritur me rreth 24 për qind.
Për ekspertin e ekonomisë, Igli Tola ky është një sinjal pozitiv, pasi tregon se shqiptarët po diversifikojnë format e investimit.
“Sinjal në rritje që tregon se qytetarët shqiptarë dhe aktorët ekonomikë janë të prirur drejt investimeve financiare dhe ky është një prej formave edhe jashtë që më shumti angazhon familjarët dhe të punësuarit”, shprehet Tola.
Me gjithë rritjen, aktualisht vetëm 2.8 për qind e të punësuarve në fend kontribuojnë vullnetarisht në skemat vullnetare të pensioneve. Kjo për ekspertët lidhet me disa arsye.
“Arsyeja kryesore lidhet me nivelin e pagës. Jemi vendi me pagat më të ulëta dhe kjo shpesh nuk lejon pagesa të tera”, shton Tola.
Për shkak të shifrave të ulëta të të përfshirëve në skemat e pensioneve private vullnetare, AMF ka hartuar një projektligj, i cili po diskutohet në komisionet parlamentare për të pasur edhe një skemë hibride pensionesh të detyruar mes privatit dhe shtetit. Një skemë e ngjashme aplikohet aktualisht edhe në shumë vende të tjera, duke sjellë përfitime të shumëfishta për ata që investojnë, por edhe për tregun financiar dhe ekonominë respektive.
