Ekspertët e ekonomisë i rekomandojnë parlamentit që të miratojë projektligjin për pensionet private, që është në diskutim në Komisionin parlamentar të Ekonomisë dhe që synon krijimin e kolonës së tretë në këtë skemë.
Sipas Elisabeta Katiaj, nënkryetare e Dhomës së Biznesit të Diasporës, njëherazi ish zv.drejtore e Përgjithshme e Tatimeve, zhvillimi i pensioneve private është mënyra e vetme që e gjithë skema e sigurimeve të funksionojë dhe të zhvillohet, pasi shteti nuk mund të përballojë gjithçka. Deklaratat u bënë në emisionin A2 Business të gazetares Aurora Sulce, ku u diskutua për rritjen e pagës minimale dhe rritjen e kostove për biznesin nga një vendim i tillë.
“Në rast se nuk fuqizohet dhe nuk detyrohet bashkëpunimi shtet-privat për skemën e pensioneve private, nuk mund të presim mrekullira nga skema shtetërore e sigurimeve. Ligji duhet të bindë që të aplikohet skema private e pensioneve. Pasi jo cdo gjë mund të zgjidhë shteti dhe ai buxhet i dedikuar. Kështu që mund të rregullohet sektori privat nëpërmjet skemës së pensioneve private.
Duhet të krijohet kolona e tretë në skemën e sigurimeve, sic e kanë edhe vendet e tjera, pasi ne e kemi infrastrukturën shumë të mirë të krijuar dhe funksionale”, ka deklaruar Katiaj.
Të njëjtin mendim ndau edhe Igli Tola, eksperti i ekonomisë i ftuar në emision. Sipas tij, duhet zhvilluar kolona e tretë në skemën e sigurimeve, sic e kanë vende afër nesh në rajon, si Maqedonia e Veriut.
