Euro ka pësuar sot një tjetër rënie të fortë, duke zbritur sipas kursit të Bankës së Shqipërisë në 114 lekë. Tatëpjeta e monedhës së përbashkët europiane ka nisur tashmë prej disa ditësh dhe vjen duke u thelluar. Ndërkohë që në rënie është edhe dollari, që ka prekur kuotën e 107.6 lekëve.
Agjentët në tregun e këmbimit shpjegojnë se arsyeja e dobësimit të euros është sasia e madhe e saj në treg. Kjo për shkak të prurjeve të mëdha valutore, jo vetëm nga emigrantët, por edhe nga burime informale. Nga ana tjetër, kërkesa për euro mbetet e dobët. Kjo pasi importuesit dhe tregtarët po blejnë më pak mallra dhe produkte, për shkak të tkurrjes së konsumit, pasojë e ngadalësimit të aktivitetit ekonomik në vend. Ndërkohë që edhe importet e energjisë janë frenuar, duke bërë që edhe KESH të mos ketë nevojë për euro dhe të mos tërheqë valutë nga tregu.
Ekspertët parashikojnë që nën ndikimin e këtyre faktorëve, euro të vazhdojë të bjerë dhe me shumë gjasë të prekë edhe minimumin e 113 lekëve, të shënuar në fund të vitit të kaluar.
