LIGJET E BIZNESIT
Numri i grave në biznes ka pësuar rënie në vendin tonë, ku sipas statistikave vetëm 25.5% e totalit të bizneseve drejtohen nga gratë. Kundrejt të njëjtës periudhë të një viti më parë, numri i grave që janë pronare ose drejtojnë një biznes është ulur me 1.4%. Ndërkohë që përqindja e grave pronare apo administratore është më e lartë tek ndërmarrjet e vogla, me 1 deri në 4 të punësuar.
Sipas Arlinda Mujës, kryetare e Shoqatës së Mikrofinancës dhe drejtore ekzekutive e Kredo.al, ”edhe kur janë sipërmarrëse vetë, ata kërkojnë në krah një burrë për t’i mbështetur, dhe kjo më tregon një mungesë konfidence për të ndërtuar diçka vetëm”.
Muja radhit disa problematika. “Aksesi në financë, sigurisht, përqasja në dyert e institucioneve shtetërore ose të tjera që mund të mbështesin këto biznese është ndryshe. Nuk ndodh thjesht sepse janë femra, por për mungesë vetëbesimi nuk arrijnë ta çojnë luftën e tyre deri në fund, është një proces që kërkon kohë”, shprehet ajo.
Kryetarja e shoqatës së Mikrofinancës Arlinda Muja thekson se në sektorin privat dhe sektorin e bankave dominojnë femrat, ndërsa e vë theksin te cilësia dhe jo te përqindja e tyre, në suksesin e një biznesi.
“Përqindja e grave në sektorë të ndryshëm kemi luhatje të ndryshme në sektorin privat e sektorin e bankave dominojnë femrat dhe kjo ndodh për shkak të edukimit dhe përzgjedhjes e strategjisë që kanë bankat e institucionet financiare. Ne financojmë 40% të bizneseve që drejtohen nga femrat dhe ka tentativë për ta rritur. Një biznes që të jetë i suksesshëm duhet cilësia dhe jo përqindja. Femra tregon që është më e përkushtuar në punë”, deklaron Muja.
Këto deklarata, drejtorja ekzekutive e Kredo.al i bëri në emisionin A2 Business të gazetares Aurora Sulce.
