Energjia gjatë 2022/ Kriza rriti importet, uli prodhimin dhe konsumin

Kriza energjetike kushtëzoi një nivel të ulët prodhimi të energjisë dhe rritje të ndjeshme të importeve. Instituti i Statistikave ka publikuar Bilancin e Energjisë Elektrike për vitin 2022. Të dhënat tregojnë se për shkak të mungesës së reshjeve, hidrocentralet gjeneruan pak më shumë se 7 mijë gigavat/orë energji nga gati 9 mijë në vitin 2021 duke shënuar kështu një tkurrje me 22 për qind.

Impiantet privatë të prodhimit të energjisë rritën ndjeshëm peshën e tyre në prodhim. Sipas INSTAt-it, hidrocentralet publike prodhuar rreth 55 % të totalit, ndërsa pjesa tjetër erdhi nga HEC-et private, ndërsa energjia nga dielli kontribuoi me vetëm 0.7 për qind të energjisë. Në mungesë të prodhimit vendas, Korporata Elektroenergjetike Shqiptare bleu mbi 3 mijë gigavat/orë energji ose rreth 35.1% më shumë se një vit më parë.

Megjithëse energjia për qytetarët dhe bizneset nuk mungoi në asnjë moment, sasia në dispozicion vitin e shkuar ra në 1 mijë e 658 gigavat nga gati 1 mijë e 800 në vitin 2021.

Mes krizës së çmimeve në bursat ndërkombëtare, nxitur edhe nga lufta në Ukrainë, si dhe paralajmërimeve për shtrenjtim të energjisë në vend, qytetarët dhe bizneset konsumuan më pak. Të dhënat nga INSTAT tregojnë se përdorimi i energjisë elektrike ra në 6 mijë e 266 gigavat gjatë vitit të shkuar nga 6 mijë e 630 në 2021-shin.

Viti i shkuar ndërkohë ishte pozitiv për sektorin energjetik në drejtim të humbjeve në rrjet. Të dhënat tregojnë se ato u reduktuan në rreth 1 mijë e 600 gigavat/orë nga gati 1 mijë e 800 në 2021-shin.

Si kurrë më parë, për të siguruar sasinë e nevojshme, nga fondi i vënë në dispozicion nga qeveria u shpenzuan rreth 400 milionë euro.