Ekonomia shqiptare ka varësinë më të madhe në kontinent nga dërgesat e emigrantëve, që ndryshe njihen si remitancat. Sipas të dhënave të Institutit Europian të Statistikave (Eurostat), të ardhurat nga emigrantët vlerësohen për vitin 2021 në rreth 1.13 miliardë euro, ose sa 6.7% të Prodhimit të Brendshëm Bruto. Pas Shqipërisë, me nivelin më të lartë të remitancave renditet Mali i Zi, me 6.1% të PBB-së.
Origjina e pjesës më të madhe të remitancave drejt Shqipërisë janë nga emigrantët që jetojnë dhe punojnë në Itali, me një total prej 279 milionë euro. Në vend të dytë është Mbretëria e Bashkuar me 206 milionë euro. Që prej vitit 2017 është rritur me 11 milionë euro shuma e parave të dërguara nga ishulli, ndërsa gjithnjë e më shumë shqiptarët emigrojnë drejt këtij destinacioni.
Në vendin e tretë për dërgimin e parave është Gjermania, me 172.8 milionë euro, e cila ka rritje me 70%. Në 2017-ën nga ky vend dërgoheshin 100 milionë euro.
Në vendin e katërt për paratë e dërguara qëndron Greqia me 172.3 milionë euro. Edhe pse vitet e fundit ky vend preferohet më pak për emigrim, sërish dërgesat vijnë me rritje nga 2017, ku niveli qëndronte në 90 milionë euro.
Në total, nga 27 vendet e BE janë dërguar 744.6 milionë euro, ndërsa tashmë përveçse para për konsum në familje, diaspora po investon edhe në pasuri të paluajtshme.
Gjithashtu, që pas fillimit të pandemisë gjithmonë e më shumë po dërgohen para nëpërmejt kanaleve zyrtare, që ka rritur konsiderueshëm vlerën e parave që dërgohen në vend.
