Drafti që takson profesionet e lira sot në Parlament, kontabilistët, mjekët dhe avokatët i drejtohen Gjykatës Kushtetuese

Projektligji “Për tatimin mbi të ardhurat”, që parashikon taksimin me 15 deri në 23% të profesioneve të lira do të diskutohet sot në seancë plenare në Parlament, nga ku pritet të miratohet me votat e mazhorancës.

Një draft i konsideruar antiligjor nga profesionistët e lirë si, kontabilistë, avokatë, mjekë etj. Grupet e interesit pretendojnë se projektligji i qeverisë i konsideron të ardhurat që ata sigurojnë nga bizneset e tyre si të ardhura nga paga, cka është në kundërshtim me ligjin. Pasi ata janë të vetëpunësuar, që kanë investuar në profesion dhe bëjnë biznes, madje duke punësuar edhe të tjerë.

Për këtë arsye, ata kanë deklaruar se do ta dërgojnë në Gjykatën Kushtetuese projektligjin “Për tatimin mbi të ardhurat”. Lajmin e ka bërë të ditur Sotiraq Dhamo, Kryetar i Bordit Drejtues të Institutit të Kontabilistëve të Miratuar. Dhamo ka deklaruar se për dërgimin e ligjit në Kushtetuese përveç kontabilistëve do të organizohen edhe Dhoma e Avokatëve dhe Mjekëve.