Prej vitesh, borxhi publik ka qenë një ndër treguesit problematikë të financave publike. Kjo është arsyeja që qeveria, edhe me rekomandimin e partnerëve ndërkombëtare, si FMN dhe Banka Botërore, është futur në rrugën e konsolidimit fiskal. E thënë ndryshe, uljes së nivelit të borxhit. Por sa është aktualisht ky tregues?
Sipas të dhënave të Ministrisë së Financave, borxhi publik arriti në fund të vitit 2022 në 68.9%, duke pësuar rënie vitet e fundit. Në 2020-ën, për shkak edhe të pandemisë, ky tregues kapërceu në nivelin e 74.4%. Ndërkohë borxhi pritet të zbresë këtë vit më 67.5% dhe qeveria ka marrë angazhimin ambicioz për të bërë uljen e mëtejshme të tij.
Vlen të theksohet se në nivelin aktual të borxhit nuk janë përfshirë detyrimet e kontratave koncensionare PPP; vendimet e arbitrazhit ndërkombëtar, si dhe vendimet e gjykatave vendase për largimet e padrejta nga puna, të cilat do ta rrisnin ndjeshëm nivelin e borxhit.
Por si paraqitemi krahasuar me vendet e tjera të rajonit?
Sipas të dhënave të Komisionit Europian, me një nivel prej 68.9% Shqipëria renditet ndër vendet me nivelin më të lartë të borxhit publik në rajon, duke lënë pas vetëm malin e Zi që ka një nivel borxhi më të lartë se ne.
