Bankat Qendrore në alarm, pritet shtrenjtim i mëtejshëm i interesave dhe kredive

Inflacioni i lartë pritet të shoqërohet me rritje të tjera të normave të interesit nga Bankat Qendrore. Sinjali është dhënë nga Rezerva Federale (FED), që thotë se inflacioni mbetet në mënyrë të pakëndshme i lartë dhe se rritja shtesë e normave të interesit është e nevojshme për ta mbajtur atë nën kontroll.

Raporti që u ofron ligjvënësve një përditësim mbi politikën monetare dhe zhvillimet ekonomike vjen vetëm pak ditë përpara se kryetari i FED-it, Jerome Powell, të dëshmojë në Capitol Hill. Bankierët qendrorë janë në mes të fushatës më agresive që nga vitet 1980 për të shtypur inflacionin e lartë dhe të qëndrueshëm. Megjithëse indeksi i çmimeve të konsumit ka rënë ngadalë nga niveli i lartë prej 9.1% i shënuar në qershor, ai mbetet rreth tre herë më i lartë se mesatarja e para pandemisë.

Zyrtarët e Rezervave Federale kanë pranuar se normat mund të kenë nevojë të shkojnë më lart se sa pritej dhe të mbeten të larta për një kohë të gjatë.

E njëjta politikë shtrënguese monetare është zbatuar edhe Banka Qendrore Europiane, që ka rritur normën bazë të interesit për euron, si dhe nga Bankat Qendrore të vendeve të tjera.

Edhe Banka e Shqipërisë që prej marsit të vitit të kaluar ka ndryshuar kahun e politikës monetare, duke rritur vazhdimisht normën bazë të interesit për lekun. Këto ndërhyrje u frenuan në dhjetor dhe deri më tani, BSH nuk ka bërë rritje të tjera.

Gjithsesi, sinjalet nga tregjet ndërkombëtare dhe institucionet mbikëqyrëse bankare nuk premtojnë për mirë. Kjo do të thotë se nëse normat bazë të interesit për dollarin dhe euron do të rriten, kjo automatikisht do të cojë në një shtrenjtim të mëtejshëm të kredive në këto monedha. Ndërkohë që rritja e normave të interesit do të ndiqej edhe nga Banka e Shqipërisë, nëse inflacioni në vendin tonë do të kapërcente mbi nivelet e 7.2%, që shënoi në janar.