A po investojnë bizneset? Sipërmarrësi i suksesshëm tregon arsyet e stepjes

Sipërmarrësi Maksim Caslli renditi në emisionin A2 Business të gazetares Aurora Sulce disa nga arsyet se përse sipas tij, bizneset nuk ndërmarrin më risqe të mëdha për të investuar.

Caslli shpjegon se kemi hyrë në një cikël të ri zhvillimi që përkon me një situatë ndryshe të të bërit biznes dhe ambient ndryshe krahasuar me atë të viteve të para të demokracisë. Ai shton se në momentet që flasim vetëm 10-12% e bizneseve, që kryesisht janë të mëdha kanë mundësi të depozitojnë para në banka.

“Kemi të bëjmë me mbarimin e një cikli zhvillimi dhe nisjen e një tjetrit. Nga 2010 ka një ngritje të ngadaltë dhe shumë biznese po bien. Nëse në 1990 nuk kishim cash dhe të gjithë mund të bënin biznes, tani kemi një situatë ndryshe. Kemi një ambient tjetër biznesi. Janë vetëm 10-12% e bizneseve që kanë cash. Këto biznese mund të depozitojnë para në banka, të tjerë janë qytetarë shqiptarë. Situata ka ndryshuar, risqet janë rritur, ambienti po ashtu, kemi dhe ndryshimin e gjeneratave”, tha Caslli.