Tregtia me Malin e Zi, shkëmbimet u rritën ndjeshëm pas pandemisë

Bashkëpunimi në fushën ekonomike ndërmjet Shqipërisë dhe Malit të Zi ka shënuar një rritje të ndjeshme gjatë viteve të fundit.

Të dhënat nga INSTAT tregojnë që kemi një rritje të shkëmbimeve tregtare në vitet e fundit, veçanërisht në vitin 2022. Vlera e importeve vitin e kaluar ishte 4.9 miliardë lekë, ndërsa eksportet e mallrave shqiptare drejt fqinjëve u rritën në 7.5 miliardë lekë.

Në total, shkëmbimet arritën në rreth 107 milionë euro, nga rreth 69 milionë euro në vitin 2018. Megjithatë këto shifra mbeten të ulëta nëse i krahasojmë me partnerë të tjerë, ndërsa numri i produkteve që shkëmbehen është i vogël.

Sipas të dhënave nga INSTAT, nga Shqipëria drejt Malit të Zi më së shumti janë transportuar gëlqere dhe çimento me vlerë 1.3 miliardë lekë , lëndë djegëse me vlerë 1.3 miliardë lekë, ndjekur nga çeliku dhe perimet.

Ndërsa importet konsistojnë kryesisht në lëndët djegëse në vlerën 3.1 miliardë lekë, druri dhe nënproduktet e tij me 850 milionë lekë, ndjekur nga alumini dhe pijet alkoolike.

Bizneset në të dy anët e kufirit shprehen se investimet në infrastrukturë, si linja hekurudhore apo ndërtimi i korridorit blu mund të rrisë ndjeshëm shkëmbimet midis dy shteteve.