Shoqata e Industrisë së Përpunuesve të Qumështit ka reaguar për rritjen e çmimeve të bulmeteve. Përfaqësuesit e sektorit deklaruan se shtrenjtimi do të prekë vetëm 1 kompani dhe vetëm nënproduktet e qumështit të deles dhe dhisë. Shoqata hodhi poshtë edhe akuzat për shkelje të konkurrencës, ndërsa i kërkoi qeverisë të rrisë subvencionet.
“Qumështi i të imtave, i deleve dhe dhive është blerë nga blegtorët 50% më shtrenjtë se viti i kaluar. Sasia e prodhimit ka ardhur në rënie këtë vit. Kjo e konfirmuar edhe nga INSTAT se nuk është numri i njëjtë i krerëve i deleve dhe dhive që mbarështohen në vendin tonë. Produktet me qumësht lope nuk do të kenë ndryshim të çmimit dhe është vetëm një kompani që ka lajmëruar ndryshim të çmimit për produktet me qumësht dele dhe dhie.
Asnjë nga kompanitë e tjera nuk do të ketë ndryshim të çmimeve të produkteve të tyre, qartazi vërtetohet se nuk ka asnjë dakordësi për çmimet në sektorin e përpunimit të qumështit. Ky është një treg i lirë dhe asnjë operator nuk ka të mundësi të vendosë për çmimet”, deklaroi përfaqësuesi i Shoqatës së Industrisë së Përpunuesve të Qumështit.
