LIGJET E BIZNESIT
Qeveria do të kompensojë sektorin fason për rritjen e pagës minimale nga 34 mijë lekë në 40 mijë lekë, të paralajmëruar nga kryeministri Rama dhe që pritet të zyrtarizohet muajin e ardhshëm. Burime nga Pro Eksport Albania, shoqata që përfaqëson interesat e industrisë fason bëjnë të ditur për Fast News Economy se në tryezat e zhvilluara me qeverinë është dakordësuar që Ministria e Financave të mbulojë kostot e sigurimeve shoqërore që rrjedhin nga rritjea e pagës minimale.
Për këtë arsye, i është kërkuar sektorit fason që të evidentojë me saktësi sesa është numri i punonjësve që paguhen aktualisht me pagë minimale. Ndërkohë që sipas të dhënave, në total ky sektor ka të punësuar rreth 80 mijë vetë.
Burimet e mësipërme bëjnë të ditur se kostot e pagave në industrinë fason përbëjnë 80% të totalit shpenzimeve. Kjo do të thotë se industria goditet nga një vendim i rritjes së pagës minimale, në kushtet kur ndërmarrjet e këtij sektori po përballen me shtrenjtimin e lëndëve të para, rënien e euros dhe mungesën e fuqisë punëtore.
