Amnistia fiskale pritet të konkretizohet këtë vit nga qeveria. Amnistia synon legalizimin e parave cash nga burime informale, dhe krahas vlerave monetare pritet të legalizohen edhe pronat dhe sendet me vlerë. Një iniciativë nga e cila qeveria pret të arkëtojë rreth 2 miliardë euro. Si pritet të ndikojë në ekonomi kjo nismë, veçanërisht për sa i përket kursit valutor?
Eksperti Majlind Lazimi, i ftuar në “A2 Business”, është skeptik mbi shifrat e deklaruara nga qeveria.
Sipas tij, “efekti i 2 miliardë eurove të mbledhur për shkak të amnistisë nuk besoj se do të ndodhë. Gjithmonë kanë dështuar këto iniciativa, në 2011 u arkëtuan rreth 30 milionë euro”. Për ekspertin, ngërçi është politik.
“Ata që deklarojnë këto pasuri do të duhet të kishin garancinë që qeveria e radhës mos ta hetojë, diçka që askush mund ta garantojë. E shikoj të vështirë politikisht, nga momenti që vetë situata politike është e tensionuar dhe do të krijojë një polarizim në shoqëri, ku nga një anë ka një lloj mbytje të biznesit formal, nga ana tjetër kemi qëndrim të kundërt për paratë informale deri në 2 milionë euro, ka edhe një problem moral këtu”, thotë Lazimi.
Problemet operacionale duken po aq të vështira, duke filluar nga përcaktimi i se paratë nuk vijnë nga aktivitet kriminal, veçanërisht për ato para që vijnë nga diaspora.
Për ekspertin Ermal Telha, “ato kapitale që synojnë të ligjërohen tashmë janë brenda Shqipërisë. Paratë e tjera që ndodhen në emigracion është e pamundur të kanalizohen në vijë zyrtare. Pra ato para duhet të vijnë një herë në Shqipëri, dhe ky është ngërç në vete sepse në kufi lejohen vetëm 10 mijë euro.
Magneti që shtyn përpara këtë iniciativë në gjykimin tij është prurje financiare që qarkullon në kanalet zyrtare brenda territorit të Shqipërisë, ka ardhur si ka ardhur është çështje tjetër.
Por në lidhje me kursin, si do të ndikojë amnistia? Telha mendon se “në momentin që legalizojmë dhe shtojmë të tjera kanale komunikimi për të shtuar flukset, sigurisht që euro do të bjerë serish. Pra lum ata që paguhen në lekë dhe blejnë në euro dhe mjerë ata që punojnë për të eksportuar”.
