Ashtu si qytetarët, edhe bizneset vuajnë nga gjyqet që zgjaten pafund. Për çështje të ndryshme, dosjet zvarriten me vite në gjykata, duke u kthyer në kosto për sipërmarrjen. Gjendja është rënduar edhe më shumë pas vetting-ut në sistemin gjyqësor, proces që është shoqëruar me reduktimin e ndjeshëm të numrit të gjykatësve.
Në A2 Business me Aurora Sulçen, në A2 CNN, avokati Gent Çifligu theksoi se situata e biznesit është e pashpresë: “Është situatë e pashpresë për biznesin. Reforma në Drejtësi, apo vettingu, nuk ka marrë në konsideratë një nga faktorët kryesorë: burimet njerëzore. Grupet që punuan duhet të kishin llogaritur efektin e reformës në burimet njerëzore. Shkolla e Magjistraturës duhet të kishte rritur numrin e pranimeve të reja”.
Në të njëjtën linjë mendimi edhe Gerti Shella, ekspert për çështjet gjyqësore: “Vetting-u largon gjyqtarët, Shkolla e Magjistraturës nuk po nxjerr të rinj për t’i zëvendësuar. Ka një mungesë koordinimi absolut mes organeve të reja gjyqësore. Nuk mund t’i lëmë gjykatat pa gjyqtarë”.
Eksperti i ekonomisë, Bardh Sejdarasi nënvizoi: “Duhej të shtrohej pyetja pse ka kaq shumë dosje e më pas të dilej te reforma rregullatore. Ka patur probleme me ekspertët e atashuar në gjykatë për të zgjidhur çështjet e biznesit. 32 000 dosjet që janë sot në Gjykatë të Lartë kanë qenë aty dhe kjo është çështje performance që kanë pasur të gjitha shkallët e gjykimit”.
