Një vit i vështirë ekonomik. Është ky parashikimi që bën Fondi Monetar Ndërkombëtar në raportin e fundit për ekonominë globale. Sipas FMN-së, shtetet që udhëheqin ekonominë botërore rrezikojnë të përballen me një stanjacion të forte, për shkak të dobësimit të aktivitetit ekonomik, shkaktuar nga pandemia Covid-19 dhe konfliktet e armatosura.
Drejtuesja e Fondit Monetar Ndërkombëtar, Kristalina Georgieva, tha se 1/3 e ekonomisë botërore pritet të ndalet në rececion dhe se 2023 do të jetë një vit financiar edhe më i vështirë se viti që lamë citon “Financial Times”.
Sipas FMN, rritja ekonomike për vitin 2023 parashikohet jo më shumë se 2.7%, në rënie nga 3.2% që ishte parashikuar më herët.
Çmimet e larta, problemet për furnizim, rritja e normave të interesit dhe konflikti i vazhdueshëm në Ukrainë, janë shkaktarët e frenimit të rritjes ekonomike.
Në fund të dhjetorit, FMN tha se mënyra sesi Kina, përsëri, po përpëlitet të menaxhojë pandeminë koronavirus, duke i shkaktuar botës përsëri dhimbje koke, këtë herë në aspektin ekonomik. Por sipas FMN, në recesion këtë vit mund të përjetojë edhe ekonomia më e madhe në botë, ajo amerikane, edhe pse ekonomistët më në zë atje, thonë se SHBA-të mund ta shmangin këtë, me shtrëngime të politikave qeverisëse dhe rritje të lehtë të normës së interesit, që lehtëson presionin e inflacionit.
Po sipas FMN, Europa do ta ndjejë më shumë krizën ekonomike këtë vit, me ndikim e konfliktit Rusi-Ukrainë, rritjen e çmimeve të ushqimeve, të energjisë dhe inflacionit. Banka Qendrore Europiane parashikon që ekonomia europiane të rritet këtë vit me 0.5%, me 1.9% në 2024 e të bjerë sërish në 1.8%në vitin 2025.
Ekonomia shqiptare pritet të ngadalësohet
FMN është sikeptike edhe për ecurinë e ekonomisë shqiptare. Sipas raportit të Fondit, ekonomia jonë do të ngadalësohet ndjeshëm këtë vit. Kriza globale e çmimeve dhe presionet inflacioniste mbeten rreziqet kryesore duke bërë që si qeveria ashtu edhe organizmat ndërkombëtare të kenë projeksione më pesimiste për ecurinë e ekonomisë.
Parashikimin më konservator e bën Fondi Monetar Ndërkombëtar sipas të cilit ekonomia shqiptare do të rritet me vetëm 2% në vitin 2023, më e ulëta sipas tij në rajon.
Ndikimi i luftës në Ukrainë, rritja e çmimit të energjisë dhe ngadalësimi i rritjes ekonomike botërore shihen si faktorët kryesorë edhe nga Banka Botërore që pritet të ngadalësojnë edhe ritmet e rritjes ekonomike të vendit tonë.
Në vlerësimet e saj të fundit, Shqipëria pritet të ketë rritjen e prodhimit të brendshëm bruto 2.3% për vitin 2023, nga 3.2% të pritshëm në 2022 ndikuar nga ecuria mjaft pozitive e turizmit. Thuajse në të njëjtat nivele e parashikon edhe Banka e Shqipërisë rritjen ekonomike për 2023, në 2.4% ndërsa evidenton inflacionin e lartë si rrezikun kryesor të ekonomisë.
Edhe qeveria parashikon që këtë vit ekonomia të ngadalësohet, me një rritje të parashikuar në buxhetin 2023 me vetëm 2.6%.
