Bizneset që preken më shumë nga kriza

Ekonomia shqiptare po përballet me një krizë të përgjithshme, që ka përfshirë të gjithë ekonominë globale. Fillimisht pandemia e më pas lufta në Ukrainë, ka rritur çmimet thuajse të gjithçkaje, duke vendosur në vështirësi pjesën dërrmuese të bizneseve, kostot e të cilëve gjithashtu janë rritur ndjeshëm.

Por, në periudha krizash ka edhe biznese që zhvillohen. Cilat janë ato që ecin dhe ato që ngecin? Ku mund të investohet në këtë kohë krize?

Maksim Caslli, ekspert për ekonominë dhe CEO i American Capital, i ftuar në “A2 Business” të gazetares Aurora Sulçe, u shpreh se “kur ka recesion, në të gjithë botën, konsumatorët fokusohen te gjërat e domosdoshme dhe për këtë arsye bizneset e luksit rëndohen më shumë nga krizat”.

“Në raste të tilla, duhet rritur konsumi i atyre që kanë mundësi të shpenzojnë. Ata që kanë, duhet të shpenzojnë sa më shumë që të mbyllin boshllëkun e atyre që nuk shpenzojnë. Problemi është se në Shqipëri janë shumë të paktë ata që kanë mundësi të shpenzojnë. Shumica e popullsisë është për nevojat bazë dhe kriza ndihet më shumë. Duke qenë se importojmë më shumë sesa eksportojmë, as nuk mbrohemi dot nga kriza”, tha Caslli.

Elisabeta Katiaj, nënkryetare e Dhomës së Biznesit të Diasporës, u shpreh: “Në Shqipëri, inflacioni prek më shumë të varfërit, pasi nuk kompensohet nga rritja e pagave. Tregtia e ushqimeve do të pësojë krizë, por kryesisht te ndërmarrjet e vogla dhe të mesme”.