Besimi tek ekonomia, qytetarët dhe bizneset më optimistë

Ngadalësimi i ritmeve të rritjes së inflacionit, që dëshmon për një stabilizim të çmimeve ka rikthyer besimin tek qytetarët dhe bizneset. Sipas Treguesit të Ndjesisë Ekonomike, që publikohet nga Banka e Shqipërisë, besimi në ekonomi u përmirësua për muajin e dytë radhazi në dhjetor, me 2.9 pikë.

“Treguesi i besimit të industrisë (TBI) rezultoi në rritje me rreth 2.9 pikë përqindje krahasuar me muajin e kaluar, i ndikuar nga përmirësimi i të gjithë treguesve përbërës të tij. Ndër ta veçohen rritja e balancës për prodhimin aktual dhe ajo e kontratave porositëse. Gjithashtu, bizneset presin rritje të prodhimit në të ardhmen, kundrejt pritjeve në rënie për punësimin dhe për çmimet e produkteve të tyre”, theksohet në raportin e BSH-së.

Ndërtimi dhe industria janë sektorët ku optimizmi është tani më i madh. Qëndrueshmëria e çmimeve të lëndëve të para në ndërtim ka ulur projeksionet për rritjen e kostove të apartamenteve të reja, ndërsa bizneset raportojnë edhe një gjallërim të aktivitetit ndërtues. Arsye që kombinuar me një kërkesë më të ulët për krah pune, kanë bërë që besimi në këtë sektor të rritet.