LIGJET E BIZNESIT
Qeveria shton fondin për Skemën Kombëtare të Mbështetjes në Bujqësi. Janë 200 milionë lekë që do të përdoren shtesë për fermerët dhe që janë vënë në dispozicion në Aktin Normativ të buxhetit për këtë vit. Lajmi është bërë i ditur nga ministrja e Bujqësisë, Frida Krifca në një video-mesazh, të publikuar në rrjetet sociale. Ministrja shpjegon se me këtë shtesë të fondit do të mbështeten edhe 1 mijë blegtorë të tjerë, duke e çuar numrin e përfituesve vetëm në blegtori në 5.700 blegtorë në të gjithë vendin, për rreth 800 mijë krerë të imta dhe rreth 50 mijë krerë gjedh të mbështetur.
Ministrja ka deklaruar se më këtë mbështetje financiare do të ulen kostot e tyre të prodhimit për tregjet, duke siguruar prodhim vendi për qytetarët për produktet e qumështit apo të mishit.
“Shkojmë në nivelin historik më të lartë të mbështetjes të ofruar ndonjë herë në mbështetje të drejtëpërdrejtë me 5.1 miliardë lekë pa përfshirë këtu investimet IPARD të kryera gjatë këtij viti dhe që vazhdojnë të kryhen duke prekur drejtëpërdrejtë rreth 47 mijë fermerë”, është shprehur ministrja.
Ajo ka bërë të ditur gjithashtu se likuidimi I të gjithë përfituesve do të bëhet brenda këtij muaji. “Po ecim me shpejtësi që t’i paguajmë të gjithë fermerët, blegtorët dhe peshkatarët përfitues të masave të mbështetjes brenda dhjetorit”, ka thënë Krifca në video-mesazh.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
