Rriten kostot në ndërtim, ndikuan karburanti, materialet dhe krahu i punës

Rritja e kostove godet edhe sektorin e ndërtimit, duke paralajmëruar një shtrenjtim të mëtejshëm të çmimit të banesave. Instituti i Statistikave konstaton se në tremujorin e tretë të këtij viti, Indeksi i Kushtimit në Ndërtim u rrit me 7.2%.

Në krye të shtrenjtimit është komponenti i shpenzimeve për energji, ku përfshihet dhe karburanti, 15.5% më i shtrenjtë, ndjekur nga materialet dhe shpenzimet për paga. Presioni i tregut të punës për rroga më të larta dhe projeksionet për kostot e lëndëve të para, janë ndër faktorët kryesorë që kanë çuar në rënien e besimit të sektorit të ndërtimit.

Ndërse tek qytetarët, kjo po reflektohet në rritjen e vazhdueshme të çmimit për metër katror në ndërtimet e reja.

Sipas të dhënave të Bankës së Shqipërisë, një banesë në vend dhe veçanërisht në kryeqytet, kushton sot mesatarisht 40% më shtrenjtë se një vit më parë.