LIGJET E BIZNESIT
Nuk ka të ndalur rënia e euros. Monedha e përbashkët europiane ka zbritur sot nën kuotën e 115 lekëve, niveli më i ulët i shënuar ndonjëherë. Sipas kursit zyrtar të Bankës së Shqipërisë, euro u këmbye me 114.82 lekë, në rënie me 0.39 pikë krahasuar me një ditë më parë.
Arsyeja kryesore e dobësimit kaq të fortë të monedhës europiane është rënia e ndjehsme e kërkesës në javët e fundit. Kjo pas ndërprerjes së blerjeve nga Korporata Elektroenergjetike Shqiptare. Rreshjet e shumta dhe shtimi i prurjeve të lumenjve kanë rritur prodhimin e energjisë në vend dhe kanë ulur nevojën për importe, madje në këtë periudhë KESH ka realizuar eksporte të saj në sasi të mëdha.
KESH ka qenë një faktor i rëndësishëm në tregun e këmbimit valutor gjatë këtij viti, për shkak të importeve të energjisë që vlerësohen në shifra mjaft të mëdha, me më shumë 300 milionë euro. Ndërprerja e blerjeve nga KESH i ka dobësuar edhe më shumë pozitat e euros në tregun valutor. Monedha europiane ka pasur një tendencë të vazhdueshme rënëse gjatë gjithë vitit, pavarësisht importeve të mëdha të energjisë dhe shtrenjtimit të importeve. Në datë 14 dhjetor, kursi Euro – Lek rezulton në rënie me 4.8% krahasuar me fundin e vitit 2021.
Ekspertët besojnë se për javët në vazhdim tendencat e kursit me shumë të ngjarë do të jenë në drejtim të një dobësimi të mëtejshëm të euros, duke pasur parasysh edhe faktorin sezonal. Pjesa e dytë e muajti dhjetor shoqërohet me kthim të emigrantëve dhe shtim të turistëve të huaj, duke rritur në këtë mënyrë ofertën e valutës në treg.
