Banka e Shqipërisë ka frenuar shtrëngimin e politikës monetare. Këshilli Mbikëqyrës e mbylli këtë vit pa bërë rritje të tjera të normës bazë të interesit për lekun, duke e lënë atë në 2.75 për qind. “Treguesit për rritjen ekonomike ishin më të përkeqësuara në tetor sipas të dhënave indirekte”, deklaroi guvernatori.
Ndërkohë, të paktën deri në mesin e vitit 2024, shqiptarët do të vijojnë të paguajnë më shtrenjtë për ushqimet, karburantet dhe produktet e shërbimet e tjera.
“Inflacioni pritet të ketë një pikë kthese gjatë tremujorit të katërt të vitit 2022, të reduktohet progresivisht gjatë vitit 2023 dhe të kthehet në objektivin tonë në tremujorin e katërt të vitit 2024”, shtoi guvernatori.
Norma bazë e interesit për lekun është rritur me pesë herë këtë vit, duke e çuar atë nga 0.5 për qind në 2.75 për qind. Shtrëngimi iI politikës monetare është bërë me qëllim frenimin e inflacionit, që është shndërruar aktualisht në problemin kryesor, jo vetëm të ekonomisë shqiptare, por asaj globale.
