Tronditet sërish kursi i kmëbimit. Pas fuqizimit të ndjeshëm të dollarit amerikan, ka nisur rënia e tij. Sipas kursit të Bankës së Shqipërisë, në tregun tonë të këmbimit, dollari ka zbritur në 112.19 lekë, niveli më i ulët që prej muajit qershor.
Sipas agjentëve të këmbimit valutor, kursi i këmbimit të dollarit amerikan ndaj Lekut reflekton lëvizjet e tij në kursin e këmbimit me euron dhe nuk ndikohet shumë nga faktorë të brendshëm. Kjo ndodh sepse institucionet financiare e kuotojnë kursin e të gjitha valutave të tjera bazuar në kursin e tyre kundrejt Euros, që është monedha më likuide dhe më e lehtë për t’u tregtuar në tregun e brendshëm valutor.
Arsyeja kryesore që ka sjellë dobësimin e dollarit ndaj euros në ditët e fundit kanë qenë të dhënat e reja makroekonomike nga SHBA dhe sidomos ato të lidhura me inflacionin. Ulja e inflacionit mesatar dhe e inflacionit bazë në muajin tetor rriti shpresat në tregje se Rezerva Federale do ta ngadalësojë ritmin e rritjes së normave të interesit.
Pritshmëritë për përmirësim të situatës inflacioniste dhe zbutjen e rritjes së interesave kanë ndikuar në një rënie të ndjeshme të Dollarit, që ka zbritur përsëri poshtë vlerës së paritetit me Euron. Në mesditën e sotme, dollari amerikan tregtohej me 0.96 euro.
Rënia ndaj euros po reflektohet rrjedhimisht edhe në kursin e këmbimit me Lekun. Megjithëse monedha amerikane ka një rëndësi më të vogël se euro në ekonominë shqiptare, sërish kursi i monedhës amerikane ngelet i rëndësishëm për ecurinë e çmimeve të importit të karburanteve dhe lëndëve të para të rëndësishme.
