LIGJET E BIZNESIT
Inflacioni në Eurozonë nuk ka arritur ende pikun, ndaj pritet të jetë edhe më i lartë në muajt në vijim. Këto pritshmëri u thanë nga presidentja e Bankës Qendrore Evropiane, Christine Lagarde, duke lënë të kuptojë se do të ketë një seri rritjesh të normave të interesit në të ardhmen.
Muajin e kaluar, inflacioni në Eurozonë arriti 10.6%, ndërsa pritet një ulje e lehtë deri në fund të këtij viti. Sipas Lagarde, inflacioni i Eurozonës nuk ka arritur kulmin, por rrezikon të jetë edhe më i lartë se sa pritet. Kjo nënkupton një seri rritjesh të normave të interesit në të ardhmen.
“Ne nuk shohim komponentët apo drejtimin që do të më bënte të besoja se kemi arritur kulmin e inflacionit dhe se ai do të bjerë në një kohë të shkurtër. Unë mendoj se, sa herë që pyes ekonomistët e mi të nivelit të lartë në Bankës Qendrore Europiane vendos rreziqet që mund të sjellë inflacioni”, tha Christine Lagarde.
Ekspertët ekonomikë parashikojnë se inflacioni vitin e ardhshëm të jetë në nivelin 6% dhe 2.3% në 2024, por kriza mund të zbehë këtë pritshmëri. Banka Qendrore Europiane ka rritur normën e saj për depozitat bankare me një rekord 200 pikë bazë në tre muaj për të ulur kërkesën në një përpjekje për të ulur rritjen e çmimeve.
Ndërkohë, sipas Eurostat, vendet europiane po i afrohen një recesioni gjatë tremujorëve të ardhshëm. Inflacioni në Gjermani, Itali dhe Francë u rrit më shumë se parashikimi. Njerëzit tanimë po e ndjejnë gjithnjë e më shumë koston e lartë të jetesës e cila sipas ekspertëve do të rritet edhe më shumë gjatë vitit të ardhshëm./Reuters
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
