Konfindustria apel qeverisë: Duhen masa për krizën energjetike në paketën fiskale 2023

Industrialistët i kërkojnë qeverisë që të parashikojë në paketën fiskale që po diskutohet në Kuvend masa për përballimin e krizës energjetike. Sipas Konfindustrisë, duhet të plotësohet domosdoshmërisht Paketa Fiskale 2023 me masa të prekshme dhe me ndikim të drejtëpërdrejtë në përballimin e krizës energjitike nga bizneset dhe qytetarët.

Konfindustria mbështet në parim vendosjen e takses së jashtëzakonshme për prodhuesit e energjisë, sipas modelit të vendeve të BE. Taksës së jashtëzakonshme duhet ti nënshtrohen pa përjashtim të gjithë prodhuesit e energjisë elektrike, që e kanë shitur energjinë në tregun e lirë gjatë vitit 2022 dhe jo vetëm disa prodhues të mëdhenj. Ka të dhëna, që edhe prodhues të vegjël dhe të mesëm kanë shitur energji elektrike në treg të lirë në shkelje të kontratave konçesionare, që detyrojnë shitjen energjisë kompanive publike me çmim të paracaktuar. Gjithashtu, duhen parë hapsirat ligjore të marrëveshjeve koncesionare, që taksimit të ngjashëm ti nënshtrohen edhe kompanitë prodhuese të naftës.

Konfindustria, mbështetur në vlerësimet e ardhura nga bizneset, kërkon parashikimin në Paketën Fiskale 2023 të masave si më poshtë për lehtësimin e përballimit të krizës energjitike:

1.Përjashtimin nga të gjitha llojet e taksave të “gazit të lëngshëm” për vitin fiskal 2023 pa përjashtim për përdorim familjarë, biznese dhe automjete. E njejta masë të merret për importet e “druve të zjarrit” dhe prodhimeve të ngjashme për ngrohje. Masa e mësipërme është me ndikim të ndjeshëm edhe në mbrojtjen e mjedisit nga prerjet e pemëve.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern

2.Të përjashtohen nga taksat të gjitha materialet/pjesët, që përdoren për prodhimin e “paneleve diellore” dhe prodhimeve “ termoizoluese” të banesave. Me qëllim nxitjen e industrisë së prodhimit të paneleve diellore në vend të parashikohet mbështetje financiare në buxhetin e vitit 2023, sipas modeleve të vendeve të tjera të BE dhe Rajonit.

Sipas Konfindustrisë, masat që propozohen prej saj kanë ndikim të papërfillshëm në të ardhurat e parashikuara të buxhetit të shtetit.