Hapet Panairi i Librit në Tiranë, çmimet në rritje këtë vit

Sot do të ngrejë siparin Panairi i 25-të i Librit. Një event që do të zhvillohet në Tiranë dhe që do të qëndrojë i hapur deri më 20 nëntor. Ky është viti i parë pas pandemisë, ku panairi rikthehet plotësisht i hapur për lexuesit, pa kufizimet COVID.

Në eventin e hapjes, organizatorët theksuan prirjen e rritjes së çmimeve të librave, si rezultat i rritjes së çmimit të letrës. Ndaj ata kërkuan një politikë më të favorshme fiskale nga ana e qeverisë. Shembullin e sollën nga tregjet europiane, ku që në prodhim taksa është vetëm 5%, ndërsa në Shqipëri është shumë më e lartë.

Botuesit kanë theksuar vazhdimisht nevojën e nxitjes së leximit përmes uljes së të kostos së prodhimit dhe rrjedhimisht çmimit të librit, por kësaj radhe kërkesa vjen më e fortë.

Disa prej shtëpive botuese e pranojnë që tashmë po aplikojnë çmime më të larta në masën 10-20% më shumë krahasuar me dy vite më parë.

Ata rikujtojnë se kostot u rritën edhe nga vendimi fiskal më vitin 2019 për të rikthyer TVSH-në për librin.

Panairi i 25 i Librit “Tirana 2022” po zhvillohet në mjediset e Pallatit të Kongreseve, nga Shoqata e Botuesve Shqiptarë, duke nisur nga data 16 dhe do të jetë deri me 20 nëntor.