Banka e Shqipërisë i ka dhënë dritën jeshile bashkimit me përthithje të Banka OTP Albania sh.a. (shoqëria përthithëse) me Bankën Alpha Albania sh.a. (shoqëria e përthithur). Vendimi për miratimin paraprak është marrë nga Këshilli Mbikëqyrës i BSH-së.
Blerja e Alpha Bank Albania nga OTP pritet ta ulë numrin e bankave të sektorit nga 12 në 11, duke e çuar më tej procesin e konsolidimit të sektorit që nisi në vitin 2018. Me blerjen e Alpha Bank, pjesa e tregut e OTP në Shqipëri pritet të arrijë në afërsisht 11% dhe do të vazhdojë të renditet e pesta në treg për nga madhësia, pas BKT, Credins, Raiffeisen, dhe Intesa Sanpaolo.
Marrëveshja mes grupit grek Alpha Bank dhe atij hungarez për blerjen e Alpha Bank Albania u njoftua zyrtarisht në fund të muajit dhjetor 2021. Grekët zgjodhën ofertën e hungarezëve prej 55 milionë eurosh për blerjen e 100% të aksioneve të bankës, megjithëse oferta e OTP ishte e dyta më e lartë në garë. Për grupin hungarez, kjo do të jetë blerja e dytë e rëndësishme në tregun shqiptar në më pak se katër vjet.
Në vitin 2019, OTP hyri në Shqipëri duke blerë bankën shqiptare të grupit Societe Generale. Banka OTP Albania në fund të vitit të kaluar ishte banka e pestë më e madhe në Shqipëri dhe zotëronte 6.4% të aktiveve të tregut bankar, për një vlerë totale prej 114 miliardë lekësh.
Gjithashtu, në mbledhje e fundit, Këshilli Mbikëqyrës i Bankës së Shqipërisë miratoi edhe Strategjinë Afatmesme të Zhvillimit të Bankës së Shqipërisë për periudhën 2023- 2025
Strategjia Afatmesme e Zhvillimit të Bankës së Shqipërisë 2023 – 2025 është një përditësim i strategjisë ekzistuese (2022-2024), përmes së cilit zgjatet afati i zbatimit të këtij dokumenti, përtej vitit 2024 dhe përcaktohen objektivat për periudhën afatmesme në vijim.
