Pas krijimit të ujësjellësave rajonalë nga qeveria, do të nisë shlyerja e borxheve që këto ndërmarrje i kanë Operatorit të Shpërndarjes së Energjisë Elektrike dhe Drejtorisë së Përgjithshme të Tatimeve. Bëhet fjalë për një shumë prej rreth 23.4 miliardë lekësh ose 200 milionë euro.
Një udhëzim i ri i Ministrisë së Infrastrukturës përcakton se kompanitë publike që kanë firmosur për krijimin e këtyre shoqërive të përbashkëta të ujit, do të mund të përdorin subvencionet nga shteti për të likuiduar detyrimet emergjente, apo për investime.
Konkretisht, pagesat e prapambetura për paga, sigurime shoqërore, detyrimet ndaj tatimeve dhe faturat e papaguara ndaj OSHEE do të shlyhen me këtë fond, që do të ndahet i barabartë ndërmjet Shoqërive të reja Rajonale të krijuara dhe regjistruara deri në fund të këtij muaji.
Në rast se fondi tepron, subvencioni do të përdoret për të blerë matës, mjete pune, pajisje informatike, për të zvogëluar humbjet në rrjet apo për rikonstruksione zyrash.
Kjo mbështetje nga shteti, do të llogaritet si përqindje shtesë në aksionet që Ministria e Infrastrukturës do të ketë në këto shoqëri.
Deri në fund të qershorit, ndërmarrjet e ujësjellës-kanalizimeve kishin një borxh prej 22.7 miliardë lekësh ndaj OSHEE dhe 760 milionë lekësh ndaj tatimeve, për një total prej 23.4 miliardë lekësh, apo 200 milionë euro.
