Tjetër rekord i inflacionit, në shtator arrin 8.1%, niveli më i lartë në 24 vite

Inflacioni ka shënuar një tjetër nivel rekord. Sipas Institutit të Statistikave, në shtator ky tregues arriti në 8.1 për qind, niveli më i lartë që prej periudhës së piramidave. Ndërkohë që në të njëjtën periudhë të një viti më parë, inflacioni ishte vetëm 2.5%, ndërsa muajin e kaluar ishte 8%.

INSTAT konstaton se rritja vjetore e çmimeve në muajin shtator është ndikuar kryesisht nga grupi “Ushqime dhe pije joalkoolike” me +4.91 %, pasuar nga grupi “Transporti” me 0.99%. Çmimet e grupit “Qira, ujë, lëndë djegëse dhe energji” me 0.64%, Çmimet e grupit “Mobilje, pajisje shtëpie dhe mirëmbajtje e shtëpisë” me 0.41%. Çmimet e grupit “Pije alkoolike dhe duhan” me 0.32%. Çmimet e grupit “Hotele, kafene dhe restorante” kanë kontribuar me 0.28%.

Çmimet e grupit “Mallra dhe shërbime të ndryshme” me 0.17%. Çmimet e grupit “Argëtim dhe kulturë” me 0.13%. Çmimet e grupit “Veshje dhe këpucë” me 0.11%. Çmimet e grupit “Shërbimi arsimor” me 0.05%. Çmimet e grupit “Shëndeti” me 0.04%. Çmimet e grupit “Komunikimi” me 0.03%.

Krahasuar me muajin Shtator 2021, rritja më e madhe e çmimeve vërehet në grupin “Transporti” me 17.2%, pasuar nga grupet “Ushqime dhe pije joalkoolike” me 14.0%, “Pije alkoolike dhe duhan” me 6.5%, “Hotele, kafene dhe restorante” me 6.4%, “Mobilje, pajisje shtëpie dhe mirëmbajtje e shtëpisë” me 5.5%, “Argëtim dhe kulturë” me 4.7%, “Qira, ujë, lëndë djegëse dhe energji” me 3.3%, “Veshje dhe këpucë” me 3.0%, “Mallra dhe shërbime të ndryshme” me 2.9%, “Shërbimi arsimor” me 1.8%, “Shëndeti” dhe “Komunikimi” me 0.9% secili.

Inflacioni I lartë është shndërruar në një ndër shqetësimet kryesore të ekonomisë shqiptare dhe pritet që të zgjasë deri në vitin 2024, sipas vlerësimeve të Bankës së Shqipërisë. Një shqetësim që nuk është vetëm lokal, pasi me rritjen e ndjeshme të ndjeshme të çmimeve po përballen edhe vendet e tjera europiane, veçanërisht pas nisjes së luftën në Ukrainë.