LIGJET E BIZNESIT
Këtë javë, Komisioni Europian publikoi progres-raportin për Shqipërinë, një dokument i rëndësishëm, ku jepen vlerësimet dhe rekomandimet për progresin e Shqipërisë në rrugën e integrimit. Kritikat nuk kanë munguar dhe një fokus i rëndësishëm këtë vit i është dhënë ekonomisë.
Për të diskutuar mbi qëndrimet e Bashkimit Europian për ecurinë e ekonomisë shqiptare dhe kundërshtimet mbi nismat e fundit të qeverisë ishin të ftuar në A2 Business të gazetares Aurora Sulce, Maksim Caslli, ekspert për ekonominë dhe biznesin, zotin Gent Beqiri, ekspert për ekonominë, ish-drejtor i përgjithshëm i Agjencisë për Nxitjen e Investimeve të Huaja dhe Ilir Ciko, ekspert për ekonominë.
“Raporti i jep notë mesatare. Kemi arritje dhe shqetësime. Objektivi kryesor është hyrja në BE. Derisa nuk ka një datë të caktuar, duhet të bësh të gjitha këto gjëra që kur të futesh të jesh me të njëjtat nivele me vendet e tjera. Gjetjet nuk janë ndonjë surprizë, pasi ne jetojmë çdo ditë në këtë ekonomi dhe e dimë ku jemi”, u shpreh Caslli.
“E shoh me një notë pesimiste pasi problemet që ngrihen janë të rënda dhe të vështira për t’u menaxhuar për ato që kanë nota pozitive. Është një notë mesatare me mik. Theksohen fortë problematikat që vazhdojnë prej kohësh. Nëse preken çështje si arsimi, zhvillimi, kërkimi, janë nota që kanë të bëjnë me të ardhmen dhe kthimin e kanë të gjatë në kohë. Është një kambanë e vogël alarmi që ekonomia nuk zhvillohet nëse fokusi nuk do të jetë te këto fusha”, u shpreh Gent Beqiri, ekspert për ekonominë.
“Është mirë që BE nxjerr një raport dhe ka një vëmendje ndaj Shqipërisë në një situatë të vështirë për globin. Kjo është në favor të vendit pasi tregon se ky interes i BE është në vëmendje. Sa i përket notës, them se raporti nuk është shumë i ndryshëm. Ai futet në të gjitha fushat me detaje. Nuk është se nuk ka progres nga ajo që thuhet në raport, por është i pamjaftueshëm. Është një gjuhë e kujdesshme e përdorur në raport”, tha Ilir Ciko, ekspert për ekonominë.
